Horatius, Oden, I, 37: Nunc est bibendum
 

1. Nunc est bibendum, nunc pede libero
   pulsanda tellus; nunc Saliaribus*
        ornare pulvinar* deorum
     tempus erat dapibus, sodales.
    
2. Antehac nefas° depromere Caecubum*
   cellis avitis, dum Capitolio*
        regina dementes ruinas
     funus et imperio parabat,
    
3. contaminato cum grege turpium
   morbo virorum, quidlibet impotens
        sperare fortunāque dulci
     ebria.  Sed minuit° furorem
    
4. vix una sospes navis ab ignibus,
   mentemque lymphatam Mareotico*
        redegit in veros timores
     Caesar, ab Italia volantem
    
5. remis adurgens, accipiter velut
   molles columbas* aut leporem citus
        venator in campis nivalis
     Haemoniae, daret ut catenis
    
6. fatale monstrum.  Quae generosius
   perire quaerens, nec muliebriter
        expavit ensem* nec latentes
     classe citā reparavit oras.
    
7. Ausa° et iacentem visere regiam
   vultu sereno, fortis et asperas
        tractare serpentes, ut atrum
     corpore combiberet venenum,
    
8. deliberatā morte ferocior;
   saevis Liburnis* scilicet invidens
        privata deduci superbo,
     non humilis mulier, triumpho*.